Gitan-aw sa Iligan City Traffic, Parking and Management Office o ICTPMO nga posible nga ilegal nga droga ang usa sa mga dakong hinungdan sa pagtaas sa aksidente sa kalsada sa Iligan City.
Gibutyag ni Benedicto Bañares Jr., Operation Head sa ICTPMO, nga base sa datos nga gipagawas sa Iligan City Police Office o ICPO, namatikdan ang pagsaka sa mga insidente sa aksidente sa kalsada nga posibleng nalambigit ang pag-abuso sa ilegal nga droga.
Dugang pa ni Bañares, sumala sa pipila ka taxi driver, adunay uban nga nagtuo nga ang paggamit og ilegal nga droga makatabang kanila aron dili dali kapuyon samtang nagmamaneho ug namasahero.
Apan giingnan sa hepe sa kapulisan nga sayop ug delikado kaayo ang maong pagtuo, ug gidasig ang tanang nalambigit nga undangon ang paggamit sa ilegal nga droga tungod sa daghang dautang epekto niini sa lawas ug sa kaluwasan sa kalsada.
Padayon usab nga gipahimangnoan sa ICTPMO ug sa kapulisan ang tanang drayber nga likayan ang ilegal nga droga aron mapanalipdan ang ilang kaugalingong kinabuhi, ingon man ang kaluwasan sa ubang mga motorista ug sa publiko.
Photo Courtesy to: Pulis Balita
