Nagtan-aw ang City Government of Iligan sa Artificial Intelligence o AI isip usa ka bag-ong solusyon aron mapalig-on ang transparent nga pagdumala ug smart urban mobility sa syudad.
Gipahigayon ang usa ka strategic session niadtong Disyembre 23, 2025, aron susihon ang mga AI proposals nga makatabang sa pagpaayo sa serbisyo publiko ug mas episyenteng pagplano sa transportasyon. Gipangunahan kini ni City Administrator Darwin J. Manubag kauban si City Consultant on Innovation Governance Paul Hui Lagura ug MIS-ICTC OIC-Division Chief Rex Sacayan.
Lakip sa gipresentar ang LEADGov AI, usa ka civic operating system nga nagkonektar sa citizen app ug command center aron masubay sa real-time ang mga reklamo sa katawhan ug performance sa mga opisina sa gobyerno.
Gipaila usab ang SEERMO, usa ka AI-driven tool alang sa mas epektibong urban ug transport planning, nga makatabang sa paghimo sa Local Public Transport Route Plan ug uban pang infrastructure decisions base sa tukmang datos.
Matod ni City Administrator Manubag, dako ang potensyal sa maong mga teknolohiya sa pagpaayo sa serbisyo publiko ug sa paghatag og klaro, data-backed nga mga desisyon alang sa kaayohan sa tanang Iliganon.
Photo copurtesy to: Neil Sahuta
