Niresulta og viral nga kasikatan ug dakong premyo ang usa ka prank nga gihimo sa duha ka Filipino-American sa usa ka McDonald’s sa Pearland niadtong 2018.
Ang mag-amigo nga sila Jevh Maravilla, 21 anyos, ug Christian Toledo, 25 anyos, nakabantay nga walay Asian nga makita sa mga promotional posters sulod sa maong fast food restaurant. Tungod niini, nakahunahuna sila og ideya nga ilaha na lang kaugalingon ang ibutang isip poster.
Sulod sa kapin usa ka bulan, nagplano ang duha ug nagpa-print og professional-looking nga poster nga murag opisyal nga advertisement. Nakapalit usab sila og daang uniporme sa McDonald’s ug naghimo og peke nga ID aron walay magduda.
Sa ilang pagbalik sa restaurant, ilang gisabit ang poster sa usa ka bakanteng bungbong nga walay bisan kinsa nga ni-question o nihunong kanila. Ang maong poster nagpabilin sa lugar sulod sa 51 ka adlaw nga wala matangtang.
Niadtong Setyembre 3, 2018, gipost ni Jevh sa social media ang litrato sa poster uban ang iyang pahayag nga kini peke lamang. Ang maong post dayong mi-viral, nga nakaangkon og gatusan ka libong likes ug shares.
Sumala sa duha, ang prank usa usab ka paagi sa pagpahayag sa kahinungdanon sa Asian representation sa advertising, nga ilang giingong inspirasyon sa salida nga Crazy Rich Asians.
Imbis nga masuko, positibo ang reaksyon sa McDonald’s. Giingon sa franchise owner nga ilang gidayeg ang creativity sa duha ug ang mensahe sa diversity. Tungod sa viral nga istorya, gidapit usab sila sa talk show ni Ellen DeGeneres.
Sa ulahi, gihatagan sa McDonald’s ang duha og tag-$25,000 ug gipaapil sa usa ka opisyal nga marketing campaign sa kompanya.
Gikan sa usa ka bakanteng bungbong, ang prank nahimong oportunidad—ug nagpamatuod nga usahay, ang pinakaseryosong balita, nagsugod sa kataw-anan.
