Gitay-og sa kusog nga magnitude 5.7 nga linog ang lungsod sa Hinatuan, Surigao del Sur alas 1:53 kaganihang kaadlawon, Disyembre 22. Nabati usab ang pagtay-og sa lain-laing bahin sa lalawigan sa Surigao del Sur, lakip ang Surigao del Norte, pipila ka lugar sa Davao Region, ug sa Butuan City.
Sumala sa earthquake bulletin sa Philippine Institute of Volcanology and Seismology (PHIVOLCS), ang linog adunay giladmon nga 10 kilometro ug ang sentro niini nahimutang sa 135 kilometro sa amihanan sa Hinatuan, Surigao del Sur.
Nabati ang Intensity III sa Bislig City, diin pipila ka residente ang nakamata tungod sa pag-uyog sa ilang mga panimalay.
Sa pagkakaron, wala pa’y nadawat nga report mahitungod sa dakong kadaot sa mga kabtangan o adunay nasamdan nga residente. Padayon usab ang pagbantay ug monitoring sa mga otoridad aron masiguro ang kaluwasan sa katawhan.
Gipahimangnoan ang publiko nga magpabiling kalmado, magmatngon sa mga pahibalo, ug mag-andam sa posibleng mosunod pang mga aftershock.
Samtang, nabati usab ang mga aftershock, lakip ang magnitude 3.9 sa lungsod sa Cagwait ug magnitude 2.3 sa lungsod gihapon sa Hinatuan, Surigao del Sur.
Photo courtesy: PHIVOLCS
