Samad dinunggaban ang nahiaguman sa duha ka mga minero, human kining gipanghansakan sa mahait nga hinagiban sa suspetsadong mangingisda. Nahitabo ang insidente sa Purok Dap-dap, Barangay Magsaysay, Placer, Surigao del Norte, bandang alas 11:20 ang takna sa kagabhion.
Ang mga biktima naila nga sila Jeffery Pabillar Remegio, 30-anyos ug Jimboy Perolino Callora, 30-anyos, parihong mga small-scale miner, ug manag samang nanimuyo sa Purok New Mine Site, Brgy. Magsaysay, Placer, Surigao del Norte.
Sa imbestigasyon sa Placer Municipal Police Station, samtang nangihi sa gawas nga bahin sa karaoke bar ang biktimang si Jimboy, kalit siyang gidunggab sa walay pag duha-duha sa suspek nga si Cincher “Gaga” Ubay Bullo, 45-anyos nga taga Purok Bakhaw, Brgy. Magsaysay, sa nahisgutang lungsod, rason sa pagkasamad sa biktima sa ubos nga bahin sa iyang wala nga ilok.
Misulay pa sa pagtabang si Jeffery, apan nasapon gihapon kini sa walop sa suspek samtang naghawid sa hait nga hinagiban, hinungdan pagkasamad sa iyang wala nga siko.
Dali usab nga gipangdala ang maga biktima sa Surigao del Norte Provincial Hospital, alang sa madali-ang medikasyon.
Sa nahitabong kagubot wala na usab naka ikyas pa ang suspek, human kining malit-ag sa niresponding otoridad, nakuha usab ang kutsilyo na gigamit sa krimen.
Sa pagkakaron ang maong supek naka kustodiya na sa Placer MPS, diin kasong Frustrated Homicide ang atubangon niini.
Photo Courtesy to: Bhaskar English
