Gipalig-on ug gipahugtan sa mga emergency responders sa Valencia City ang ilang kaandam ug abilidad sa pagtubag sa nagkalain-laing matang sa kalamidad atol sa gilunsad nga Rescue Merge: Massive Emergency Response Group Exercise, nga nailhan usab isip Golden Harvest Rescue Olympics and Fire Suppression ning bulan sa Disyembre 2025
Ang kalihukan giorganisar sa City Disaster Risk Reduction and Management Office (CDRRMO) sa pagpangulo ni June Ray Valero, kinsa gipasabot ang katuyoan sa aktibidad mao ang pagpalig-on sa koordinasyon, koneksyon, ug kapasidad sa lokal nga mga responders aron mas masaligan ug episyente ang pagtubag sa emerhensiya.
Gisalmotan ang kalihokan sa mga nagkadaiyang emergency responders gikan sa 31 ka barangay, kauban ang mga Barangay Peacekeeping Action Team (BPAT) nga nagpamatuod sa lig-on nga panaghiusa ug kolaborasyon sa tanang sektor sa disaster preparedness
Gipasundayag sa mga responders ang ilang kahanas sa nagkadaiyang rescue operations, lakip na ang rappelling, rescue ug transfer techniques, ug fire suppression drills.
Nasayrang ang Rescue Merge 2025 nagpamatuod nga ang lokal nga pangagamhanan sa Valencia City padayon nga nagapalambo sa kahanas ug kaandaman sa mga responders aron masiguro ang kaluwasan ug kaayohan sa matag Valenciano
via: Valencia City Government
