Gipasidunggan sa National Nutrition Council (NNC) Caraga ang ilang mga Local Government Units (LGU) sa rehiyon nga nakadaug sa NNC 2025 National Nutrition Awarding Ceremony nga gihimo sa Manila Hotel, isip pag-ila sa ilang kahago sa pagpasiugda sa maayong nutrisyon, nga giila nga “Champions of Good Nutrition.”
Ang maong pasidungog sa mga LGU ug mga local nutrition focal points alang kini sa ilang dedikasyon ug paningkamot aron mapalambo ang mga programa sa nutrisyon sa ilang mga komunidad.
Sumala ni Dr. Archie Labordo, NNC Regional Nutrition Program Coordinator, human sa 25 ka tuig, nakab-ot pag-usab sa NNC Caraga ang award alang sa National Outstanding Barangay Nutrition Scholar (BNS).
Nahimong Outstanding BNS si Gladys Mae Escalante gikan sa Brgy. 5, Nasipit, Agusan del Norte. Samtang ang Tandag City nakadaog usab sa ikaduhang higayon sa kategoryang CROWN Maintenance Award, ug giparangal ang ilang Nutrition Officer nga si Mary Joy Ongayo isip National Outstanding City Nutrition Action Officer.
Ang LGU Rosario, Agusan del Sur napili usab isip Top 1 CROWN o Consistent Regional Outstanding Winner in Nutrition.
Gibutyag usab ni DOH Caraga OIC Regional Director Sadaila Raki-in nga padayon ang ilang komitment sa implementasyon sa mga nutrition programs aron matuman ang tinguha nga “Nutrisyong Sapat Para sa Lahat.”
Photo courtesy: NNC Caraga
