Gidugmok sa Bureau of Internal Revenue (BIR) ang iligal nga vape products nga adunay kinatibuk-ang Php1.34 bilyon nga unpaid taxes sa lain-laing regional offices sa nasud kaniadtong Lunes, Disyembre 15, 2025.
Gipangulohan ni BIR Commissioner Charlito Martin Mendoza ang seremonya sa punong buhatan sa Quezon City. Gisulti niya nga 448,494 ka yunit sa vape products nga wala nagbayad og buhis ang dungan nga gidugmok sa operasyon sa tibuok nasud. Dugang pa mokabat sa 300,000 ka yunit ang dugmokon sa umaabot nga mga adlaw samtang nagahulat pa sa clearance sa korte.
Sa kinatibuk-an, ang tanan nga nakumpiska nga iligal nga vape products sa 2025 adunay Php2.73 bilyon nga utang sa buhis.
Gipatin-aw niya nga ang operasyon nagpakita nga dili pasagdan sa gobyerno ang pagpamaligya sa vape nga walay husto nga buhis, ug kini makatabang sa regulasyon sa konsumo, pagpugong sa paggamit, ug pag-generate og dugang pondo para sa gobyerno.
Gisiguro usab ni Mendoza nga padayon nilang bantayan ang mga tindahan ug online platforms aron masiguro nga legal ug naka-bayad og buhis ang vape products. Apil usab sa operasyon ang Department of Environment and Natural Resources ubos kang Secretary Raphael Lottilla.
Photo Courtesy to:News5
