Mipakita sa iyang kusog og kahanas sa internasyonal nga lebel ang Cebu-based marathoner nga si Artjoy Torregosa human niya makuha ang silver medal sa iyang unang pag-apil sa 33rd Southeast Asian Games women’s marathon nga gipahigayon sa Thailand.
Natapos ang lumba sa kagabhion diin nabungkag ni Torregosa ang iyang personal best record human siya nakaabot sa finish line sa 2 ka oras, 47 minutos, ug 24 segundos.
Ang multi-titled marathoner nga produkto sa University of San Carlos (USC) athletics program mipadayag og lig-on nga performance batok sa mga top runners sa rehiyon.
Giangkon sa iyang dugay na nga coach nga si Arvin Loberanis nga nalabwan ni Torregosa ang iyang miaging record.
Samtang nakuha sa Indonesia nga si Odekta Elvina Naibaho ang gold medal sa oras nga 2:42.32.
Ang podium finish ni Torregosa midugang sa ika-30 ka silver medal sa Pilipinas. Ang iyang kalampusan nagpasigarbo sa Sugbo ug sa nasud, ug nagpamatuod nga ang mga Pilipinong atleta makigbangga ug makadaog sa internasyonal nga entablado.
Photo Courtesy to: Cebu Daily news
