Giklaro ni Dr. Elisse Nicole Catalan, Capitol Piso Health Consultant nga gitinguha ug gipaningkamutan karon sa kagamhanan sa Lalawigan sa Sugbo nga ma-upgrade ang 16 ka mga balay tambalanan nga gidumala sa Probinsiya sa Sugbo.
Atol kini sa unang episode sa Istrorya Cebu diin gihisgutan ni Dr. Catalan ang importansiya nga mapalambo ang serbisying panglawas sa lalawigan.
Gipasabot ni Dr. Nikki Catalan nga dili ilalom sa kagamhanan sa lalawigan sa sugbo ang mga RHUs sa tagsa ka mga local nga kagamhanan.
Dugang niini nga pagkakaron, 16 ang mga balay tambalanan nga ilalom sa landong sa Probinsiya, mao kining 4 ka mga provincial hospitals ug adunay 12 ka mga district hospitals.
Diin sa 16 ka mga balay tambalanan, 4 niini ang mga level 1, samtang 2 ka mga balay tambalan ang level 2 hospitals, mao kining sa Lungsod sa Balamban ug sa Siyudad sa Bogo.
Samtang adunay 8 ka infirmaries diin ang mga infirmaries makaatiman lamang niadtong mga gagmay nga mga sakit, sama sa ubo ug sip-on.
Samtang ang mga level 1 nga mga ospital, aduna na kini’y mga OR kun operating rooms ug ang mga level 2, aduna na kini’y mga sub-specialties nga doctor.
Dugang ni Dr. Catalan nga gipangdugangan karon ang mga personnel sa mga balay tambalanan aron makatabang pag-atiman dayon sa mga malandig niini.
Gipaningkamutan sab karon sa probinsiya nga sunod tuig, mahimo na nga 24/7 ang mga laboratory tests sa mga balay tambalanan.
Photo Courtesy to: Province of Cebu
