Gipahigayon sa Bureau of Fisheries and Aquatic Resources o BFAR–Provincial Fishery Office sa Lanao del Norte ang duha ka adlaw nga Bangus Processing Training sa lungsod sa Kauswagan, kaniadtong Disyembre 9 ug 10, 2025, diin napili ang 16 ka mga kababayen-an isip mga trainees.
Tumong sa maong training nga mahatagan ang mga kababayen-an og alternatibong panginabuhian ug praktikal nga kahanas sa pag-debone sa bangus, lakip na ang paghimo sa preskong deboned bangus ug Spanish-style bottled bangus.
Sumala sa BFAR, ang mga value-added nga produkto nga nahimo sa training ipakita ug ibaligya sa Kauswagan Organic Trading Post aron makatabang sa pagpalambo sa lokal nga ekonomiya.
Gipahigayon ang kalihokan sa Jalen’s Biodynamic and Organic Farm, uban sa tabang sa Municipal Agriculture Office sa Kauswagan. Ang maong training nagpalig-on usab sa lokal nga panginabuhian ug organic farming initiatives, ug naghatag og dugang nga oportunidad sa mga kababayen-an aron magmalampuson sa negosyo ug makahatag og kaayohan sa ilang komunidad.
