Hugot nga gikondena sa Don Carlos Municipal Police Station ang kagubot ug kahadlok nga nahatag sa mga ginikanan human sa usa ka post sa social media nga nag-angkon ug kidnapping incident sa Purok 6A sa maong lungsod.
Sumala ni Police Senior Master Sergeant Oliver Dumayas, Desk Officer sa pakighinabi sa Juander Radyo Malaybalay, nakurat ang kapulisan sa milabayng adlaw human sa nagkalain-laing postings sa social media kabahin sa maong insidente.
“Bisan walay formal nga report nga nadawat sa among opisina, dali namong gi-imbestigahan ang maong post ug nasayran nga false alarm ra kini ug fakenews lang,” matod ni Dumayas.
Gidugang pa niya nga daling nakontak sa MPS Cybercrime Division ang Facebook user nga nag-post sa impormasyon ug gi-tambagan nga i-delete ang maong post tungod kay wala kini kamatuoran ug nakapahimo lamang ug kagubot ug kabalaka sa publiko, labi na sa mga ginikanan.
Apan, bisan sa paningkamot sa kapulisan, nagpadayon gihapon ang pag-share sa maong post gikan sa nagkalain-laing Facebook accounts, hinungdan nga nagpahimangno ang MPS nga maghimo na ug mas hugot nga lakang batok sa mga nagpadayon sa pagpakaylap sa fakenews.
“Dili nato tugutan nga ang dili tinuod nga impormasyon mopahimo ug panic sa komunidad. Ang kapulisan magpadayon sa pag-monitor ug pag-aksyon batok sa bisan kinsa nga magpabiling nagpakaylap sa misinformation,” dugang pa ni Dumayas.
Ang MPS nag-awhag sa publiko nga ipahibalo dayon sa kapulisan ang bisan unsang kahimtang nga tinuod ug dili magsalig sa mga dili klaro nga impormasyon nga makita sa social media.
via: WITTENBERG/MAO NA BORLASO
