Mokabat 21 ka mga pakete sa gituohang shabu ang nakumpiska sa kapulisan atol sa search warrant implementation nga gikasa sa PDEA Region 9 sa koordinasyon sa Vincenzo Sagun MPS ug 53rd Infantry Battalion, Philippine Army sa may Purok Santan, Barangay Cogon, Vincenzo Sagun adlaw’ng Dominggo.
Ang maong search warrant may kalabutan sa paglapas sa RA 9165 kon Comprehensive Dangerous Drugs Act of 2002 nga giisyu sa RTC Branch 29, San Miguel, Zamboanga del Sur, pinetsahan kaniadtong December 11, 2025.
Target sa operasyon ang 28-anyos nga lalaki nga nalista isip high-value individual (HVI) ug ang alleged drug den operator nga mga residente sa maong lugar.
Atol sa operasyon duha ka laing mga indibidwal ang nadakpan nga gilangkuban sa 19-anyos nga lalaking laborer ug usa ka 39-anyos nga lalaking hospital staff member nga managsamang residente sa Margosatubig, Zamboanga del Sur.
Ang mga suspetsado lakip ang mga nakuha nga mga ebidensya nga druga gipailawom sa kustodiya sa PDEA Region 9 Regional Special Enforcement Team alang sa tukmang lakang.
Photo Courtesy to: PDEA Region 9
