Nagbuhat og kasaysayan si NBA superstar Stephen Curry bisan pa sa pilde sa Golden State Warriors batok sa Portland Trail Blazers, 136-131.
Sa dula, nakapuntos si Curry og 12 ka three-pointers gikan sa 19 nga iyang gibuhian, ang ikalima sa iyang karera sa NBA.
Bisan pa niining rekord, siya usab ang kinaunahang NBA player nga nakahimo og 12 ka three-pointers sa usa ka pilde (loss).
Gibitbit pag-usab ni Curry ang iyang team human nakatala og 48 puntos, apan dili kini igo batok sa Portland nga gipangunahan sa mga batan-ong magduduwa nga sila Jerami Grant ug Shaedon Sharpe.
Parehong nakahimo og 35 puntos ang duha, ug sa clutch time gidugang ni Grant ang katapusang duha ka free throw alang sa kadaogan sa Portland. Sa kinatibuk-an sa dula, nakatala si Grant og pito ka three-pointers.
Nakabira pa unta ang Warriors og labaw sa katapusang bahin sa third quarter, 79-70, apan sa pagtinabangay sa Portland, hingpit usab nga napapas ang ilang abante.
Wala usab nakapakita og impresibong depensa si Draymond Green, nga nakahimo og walo ka turnover—upat niini sa third quarter—ug sa ulahi gitawagan pa og usa ka technical foul.
Mahinumduman, bag-o pa lang nga nakabalik si Curry tungod sa minor nga injury, ug sa iyang pagbalik nakatala siya og 39 puntos batok sa Minnesota Timberwolves, apan napilde na usab ang Golden State, 127-120.
Sunod nga atubangon sa Warriors ang Phoenix Suns, samtang ang Blazers makigbatok sa Sacramento Kings.
Photo courtesy: Business Insider
