Gisugdan na sa Traffic Management Center (TMC) Malaybalay City ang usa ka dry run sa implementasyon sa 20 kph speed limit ug paggamit sa speed gun sa mga motorista nga moagi sa sentrong bahin sa dakbayan ning bulan sa Disyembre 2025.
Sumala ni Traffic Operations Officer II Lymrick C. Oro, sa pakighinabe sa Juander Radyo Malaybalay gipahigayon ang maong lakang sa mga lugar nga daghang tawo sama sa mga eskwelahan, simbahan, ug uban pang crowded nga dapit. Apan, negatibo ang reaksyon sa pipila ka motorista sa maong bag-ong patakaran.
“Gilauman nato nga makahatag kini og feedback aron mapauswag ang implementasyon sa trapiko sa dakbayan,” matod pa ni Oro
Samtang sa nagpadayon nga monitoring, nasayran nga ang dakbayan sa Malaybalay nakatala og 839 ka insidente sa kadalanan gikan Enero hangtod Nobyembre 2024, nga misaka sa 859 ka insidente sa susamang panahon niining tuiga. Dugang pa ni Oro, ang bulan sa Marso mao ang may pinakataas nga disgrasya sa tibuok tuig 2025.
Gipahimangnuan karon sa TMC Malaybalay ang tanang motorista nga magmatngon sa pagbiyahe ug gihangyo ang publiko nga mosunod sa mga balaod sa trapiko. Tumong niini nga malikayan ang disgrasya ug mga silot, ug labi na, makatabang sa pagpanalipod sa kinabuhi ug kahupayan sa tanang mogamit sa karsada.
via: TMC MALAYBALAY
