Nakakustodiya karon sa General Santos City Police Office ang usa ka PMAJ (wala panganli) human matod pa kini nagmaoy sulod sa Camp Fermin G. Lira samtang anaa kini sa impluwensya sa ilimnong makahubog.
Gibutyag ni PCOL NICOMEDES OLAIVAR JR. GSCPO City Director nga gipailawom na karon sa restricted custody ang maong pulis.
Subay sa maong panghitabo gisugo ra matod pa sa Deputy City Director for Administration ang maong personahe sa pagpanglimpyo, apan nasuko kini og nagmaoy pagawas sa kampo sakay ang sakyanan, tungod sa kahubog nabanggaan niini ang poste sa kuryente.
Human sa maong insidente gikuhaan ug armas ang personahe ug gipailawom sa imbestigasyon.
Sa pagkakaron posible kining pasakaan sa kapulisan og kasong kriminal ug administratibo, samtang gipaabot pa ang pamahayag niini kalabot sa maong panghitabo.
Photo Courtesy to:GSCPO
