Patay ang usa ka inahan ug ang iyang anak nga babae human nadisgrasya ang ilang gisakyang SUV nga aksidenteng nabangga sa Wing Van, sa Barangay Sumilihon, Butuan City, Huwebes, Disyembre 11, 2025, mga alas-6:58 sa buntag.
Naila ang drayber sa SUV nga si Vincent Mahomoc, residente sa Hayanggabon, Claver, Surigao del Norte, padulong unta sila sa Bancasi, Airport aron sugaton ang iyang igsoon nga bana sa iyang pasahero sa sakyanan.
Ang Wing Van gidrayban ni Arturo Sembrado, taga-Cagayan de Oro City, padulong unta magdeliber og glue sa usa ka plywood company sa Magallanes, Agusan del Norte.
Nagrabehan sa maong insidente ang tag-iya sa SUV nga si Gerrelyn Calaque ug ang 7-anyos niining anak nga babae nga iyang gisabak samtang naglingkod sa front seat samtang angol usab ang 10-anyos niining anak nga lalaking anaa sa passenger seat.
Giangkon ni Mahomoc nga nakatagpilaw siya samtang nagmaneho, hinungdan sa nawad-n kini sa kontrol sa sakyanan nga nibangga sa Aluminum Wing Van. Tungod sa kusog sa bangga, milahos ang SUV ug mibangga pa kini sa laing usa ka Toyota Fortuner.
Gikompirma sa Butuan Medical Center nga ang inahan ug ang iyang anak nga babae sa front seat sa SUV namatay human naipit sa dashboard sa nalumping nga sakyanan.
