Gipaalerto na sa gobyerno sa Pilipinas ang mga kaabang niini sa Portugal ug ubang kanasuran aron makita ug mabalik na sa Pilipinas ang ni-resign nga si kanhi Ako Bicol Party List Representative Zaldy Co, kinsa gideklarar nga pugante.
Diin gibutyag ni Sec. Remulla nga gi-monitor na ang kataposang lokasyon ni Co sa Portugal. Matod sa kalihim, ang tanan nga mga nasud ug tanan nga mga sentro alang sa transnational crimes sa tibuok kalibutan gipahibalo na kabahin sa pagkansela sa pasaporte ni Co.
Giangkon ni Remulla nga dugay ug hinay ang proseso kon international law ang hisgutan, apan matod niya nakig-alayon na sila sa ilang mga counterparts.
Sa bahin usab ni Co una nang gihimakak niini ang mga pasangil batok niya ug gitumbok si Presidente Ferdinand Marcos Jr. nga maoy nagpaluyo sa giingong Php100 bilyones nga budget insertions sa 2025 national budget alang sa mga proyektong imprastraktura, diin gitawag usab sa Malacañang nga walay basehanan ug espekulasyon lamang.
Kahinumduman nga usa si Co sa 16 ka akusado sa kasong graft and malversation nga may kalambigitan sa anomalosong flood control project sa Oriental Mindoro. Sa mga kauban nga akusado ni Co, siyam ang anaa na sa kustodiya sa gobyerno ug ni-plead not guilty sa Sandiganbayan.
Photo Courtesy to: The Filipino Times
