Gisugyot sa hawanan sa konseho ang pagmugna og joint task force nga motutok sa nagkagrabe nga kaso sa pagpangawat sa kable sa kuryente sa dakbayan sa Cagayan de Oro.
Atol sa regular nga sesyon sa konseho sa nilabayng adlaw, gibutyag ni Konsehal Roger Abaday ang nagkataas nga kaso sa pagpangawat sa mga kable, subay na sa gipadala nga mga video footages sa CEPALCO nga lantaran nga ginakawat ang ilahang mga wires.
Gani, sulod lang sa duha ka bulan, mokabat na sa kapin usa ka kilometro ang nakawat nga mga kable sa nagkadaiyang barangay dinhi sa syudad.
Sumala pa ni Konsehal Abaday, mugara ang mga kawatan atol sa kadlawon o sa mga oras nga mingaw na ang palibot ug tulog ang kadaghanan. Ginalantaw kini sa opisyal nga dakong hulga sa seguridad sa katawhan, sa imprastraktura ug ekonomiya.
Busa, giaghat niya ang konseho nga hinanali kining aksyonan ug magtukod og joint task force nga motutok niini nga problema. Kini nga task force langkuban sa nagkadaiyang buhatan lakip na ang CEPALCO, Philippine National Police, ug kabarangayan.
Gipunting ang pagpakusog sa pagpatrolya sa kapulisan ug mga personahe sa barangay aron nga masapon ang mga tigpangawat sa mga kable ug maminusan kini nga krimen, lakip na ang pagmonitor sa mga junk shop nga posibleng baligyaan sa mga kinawat nga kable.
