Gipasidunggan sa 2025 Technical Education and Skills Development Authority’s (TESDA) National Kabalikat Awards, ang probinsya sa Agusan del Norte, niadtong nakalabay nga adlaw, sa Philippine Trade Training Center sa Pasay City.
Ang TESDA National Kabalikat Awards, usa ka programa sa ahensya nga nagpasidungog sa mga institusyon, organisasyon, ug mga indibidwal nga adunay maayong panag-uban, kabag-ohan, ug pasalig sa pag-uswag sa technical-vocational education and training (TVET) ecosystem sa nasud.
Ang probinsya nagpakita og mga inobatibong pamaagi sa pag-uswag sa mga lokal nga komunidad, lakip ang pagpasiugda sa pagbansay sa panginabuhian sa mga barangay pinaagi sa mga inisyatibo sa pag-retool ug pag-upskilling, ug pag-awhag sa matag indibidwal aron makig -alayon sa mga program sa gobyerno.
Nakuha sa Agusan del Norte ang pasidungog tungod sa lig-on ug padayon nga suporta niini sa mga programa sa TESDA, nga naglakip sa pagpalapad sa pag-access sa mga oportunidad sa scholarship, pagpalig-on sa pagbansay nga nakabase sa komunidad, ug paghiusa sa pagpalambo sa kahanas sa mga prayoridad nga sektor niini.
Dugang pa ang parobinsya namuhunan sa mga programa aron andamon ang matag trabahante, nagsuporta sa pagtukod og pag-ayo sa mga pasilidad sa pagbansay, ug nakigtambayayong sa TESDA aron pagtubag sa mga panginahanglanon sa kahanas sa mga industriya, alang sa mga out of school youth, ug mga huyang nga grupo.
Photo Courtesy to: Philippine Information Agency
