Landig sa balay tambalanan ang usa ka motorcab driver nga taga-Brgy. San Pedro, Dapitan City human kini nabanggaan sa usa ka Toyota Vios sa atubangan sa Zamboanga del Norte Medical Center, Brgy. Sicayab, Dipolog City, kaganihang kaadlawon Disyembre 11, 2025.
Sumala sa imbestigasyon sa Dipolog City Police Station, ang motorcab nagbiyahe paingon sa dakbayan sa Dapitan samtang ang Toyota Vios gimaneho sa usa ka personahe sa LTO Dapitan nga paingon sa Dipolog.
Gikatahong ang drayber sa awto anaa ubos sa impluwensya sa ilimnong makahubog ug mitabok kini sa pikas linya, hinungdan nga unang nabanggaan ang likod sa ambulansya nga adunay dala nga pasyente nga pasaka na unta sa ZNMC ug dayon ang motorcab nga nagsunod.
Dugang pa sa kapulisan, walay injury nga nakuha ang drayber sa Toyota Vios, apan ang motorcab driver nakaangkon ug minor injury tungod sa aksidente. Gipahibalo usab sa Dipolog City Police Station nga abagahon sa nakabangga ang gasto sa ospital sa biktima isip bahin sa iyang responsibilidad.
