Gisupotahan sa Malacañang ang Anti-Political Dynasty Bill. Mao kini ang nakita ni Senador Bam Aquino kinsa miangkon nga kabahin usab sa pamilya sa politika.
Matod ni Aquino, sa wala pa mogawas ang anunsiyo sa Palasyo, nagtuo siya nga “lisod” pa gihapon ang pagpasar sa maong sugyot bisan og nakaduso na sila og kaugalingong bersyon.
Sa pangutana kon panahon na ba nga i-certify nga dinalian ang Anti-Political Dynasty Bill, ang senador niingon nga bisan og positibong simbolo kon kini ideklarar nga dinalian, dili kini kinahanglan karong panahona.
Nanghinaot si Aquino nga sa sayong bahin sa sunod tuig mapagawas na ang committee report sa maong balaudnon aron masugdan na ang deliberasyon.
Giangkon ni Senador Kiko Pangilinan nga dili sayon ang pagpasa sa Anti-Political Dynasty Law ilabi na nga upat na ka dekada nga pending kini.
Nanawagan ang senador nga mayoriya sa Kongreso ang mosuporta sa kalambuan sa maong balaudnon, dungan sa pag-ingon nga niabot na sa committee report ang maong proposal ug kinahanglang i-advance alang sa plenary deliberations.
Giklaro usab ni Pangilinan, adunay 10 ka petisyon nga nag-pending sa Korte Suprema nga naghangyo nga ideklarar nga unconstitutional ang mga political dynasties.
Photo Courtesy to:Politiko
