Padayong gihingusgan saa grupo nga BTLM sa Muswan, Maramag, Bukidnon nga sila gihapon ang adunay legal nga katungod sa yuta nga giangkon sa Central Mindanao University (CMU), bisan pa sa video nga gipagawas sa CMU nga nagpakita og dokumento sa desisyon sa korte nga nagpamatuod nga sila ang tag-iya sa giilogang luna.
Kini nga isyu miulbo pag-usab human sa demolisyon sa grupo niadtong milabay nga Oktubre, diin gikuha sa unibersidad ang yuta nga dugay nang gi-ukopa sa BTLM. Sumala ni Boyet Santillan, Presidente sa BTLM, dili makatarunganon ang giingong desisyon sa korte kay wala pa kiniy final judgment, ug tungod niini, ang CMU matod pa wala’y klarong katungod nga magpatuman og demolisyon batok kanila.
Iyang gipunting nga wala nay titulo ang CMU sa maong yuta base sa diskusyon nila sa DAR Central Office atol sa ilang panagtagbo niadtong milabay nga adlaw.
Dugang pa ni Santillan, anaa matod pa sa ilang grupo ang kumpleto nga dokumento nga naglakip sa validation gikan sa Provincial Agrarian Reform Officer, nga nagpamatuod nga ang halos 600 ka ektarya nga yuta ilawom matod pa sa ilang pag-angkon ug katungod niini.
Gipadayag usab sa BTLM nga ang proseso sa pag-aplikar sa yuta dili angay buhaton sa lokal nga lebel, kondili sa DAR Central Office, ug tungod niini ilang giinsister nga ang CMU walay basihanan sa pagkuha sa yuta.
Ilang gibarugan nga dili sila sakop sa Republic Act 6657 (Comprehensive Agrarian Reform Law), ug magpadayon sila sa pagdepensa sa ilang posisyon hangtod nga mogawas ang pinal ug legal nga desisyon sa korte. Nagpadayon ang tensyon tali sa duha ka kampo samtang naghulat sa klaro ug hingpit nga legal nga resulta sa kasong naglibot sa yuta sa Muswan, Maramag, Bukidnon.
