Nagpahibalo ang Valencia City Mayor’s Office pinaagi sa spokesperson nga si Jun Galario nga adunay sunod pa nga hugna sa Random Drug Testing alang sa tanang empleyado sa lokal nga kagamhanan, human sa pagkadiskubre nga pito (7) na ka empleyado ang nagpositibo sa druga sa unang duha ka hugna sa pagpahigayon niini.
Ang unang duha ka rounds sa drug testing gihimo niadtong bulan sa Oktubre ug sa milabay’ng semana bulan sa Nobyembre diin migula ang resulta sa 6 ka Job Order ug 1 ka regular nga empleyado ang positibo migamit sa illegal nga druga
Matod pa ni Galario, walay nakaplano nga schedule ang maong drug test ug ipatuman kini kalit aron dili makapangandam ang mga posibleng nagagamit og ilegal nga droga.
Dugang niya, lahi-lahi ang posibleng sangputanan depende sa status sa empleyado nga madakpan. Mamahimong matangtang sa trabaho, ipailalom sa Drug Rehabilitation Program, o mapasakaan og kaso ang empleyado nga mapamatud-ang naggamit og ilegal nga droga, subay sa mga balaud nga ipinatuman sa gobyerno.
Padayon nga gidasig sa Mayor’s Office ang tanang empleyado nga musuporta sa kampanya batok sa ilegal nga droga ug magpabiling limpyo sa ilang serbisyo publiko.
via: LGU VALENCIA
