Gihandom sa kadagkuan sa Cagayan de Oro Pressclub (COPC) ang ngilngig nga panghitabo sa Ampatuan Massacre sa Maguindanao nga nalakip ang 32 ka nga media workers ang gipangpatay.
Matod ni COPC President Froilan Galardo nga 16 ka tuig na ang milabay apan padayon ang syagit sa mga kabanay og hustisya. Dugang ni Galardo nga matag katuigan ilang kanunay gidumdom ang maong panghitabo uban sa panawagan sa hustisya sa 32 ka mga media workers, duha ka abogado ug 23 ka laing individual.
Samtang nagkighiusa usab ang Union of Peoples Lawyers in Mindanao (UPLM) sa paghinumdom sa ika 16 ka tuig nga kasumaran sa Ampatuan Massacre labi pa duha sa ilahang mga kaubanan ang nalakip sa mga biktima nga brutal nga gipamatay.
Gihinumdom ni Atty Bebs Musni, Secretary General sa UPLM ang duha ka mga lawyer nga sila Atty Concepcion “Connie” Brizuela ug Atty Cynthia Oquendo kinsa nagsilbing legal counsel sa pamilyang Mangudadatu.
Panawagan sab nila ngadto sa Court of Appeals nga lihukon ug solbaron ang mga apela sa pamilya sa biktima sa Ampatuan Massacre lakip na diha ang pag-ila isip biktima, sa media personality nga si Reynaldo Bebot Momay nga hangtod ning kasamtan nagpabiling missing.
Dakong kasakit kini sa dughan sa mga nahabiling pamilya labi pa wala pa nila nakab-ot ang hingpit nga hustisya bisan paman hapit na magduha ka dekada ang nilabay.
Kahinumduman nga kaniadtong Nobyembre 23, 2009 gimapamatay sa private army sa pamilyang Ampatuan nga kontra politika sa pamilyang Mangudadatu ang anaa sa 58 ka biktima nga gilangkuban sa mga media workers, kabanay sa pamilyang Mangudadatu ug bisan mga pipila ka indibidwal nga igo lang nakasabay sa panon.
Photo courtesy: NUJP-Cagayan de Oro
