Andam na si Criztian Pitt “Golden Boy” Laurente sa iyang unang laban sa Thailand, diin makig-atubang siya sa usa sa iyang kontra gikan sa India karong Nobyembre 29 sa Bangkok.
Makig-sangka si Laurente batok sa Indian prospect nga si Sagar Singh sa usa ka six-round tune-up fight isip bahin sa undercard promotion nga gipasiugdahan sa Highland Boxing Team. Ang maong event usa sa mga kalihokan sa 63rd World Boxing Council (WBC) Convention ug sa unang WBC Muay Thai Convention.
Si Laurente, nga 25 anyos ug kasamtangang Pan Pacific lightweight champion sa International Boxing Federation (IBF), dala ang usa ka limpyo nga rekord nga 15 ka kadaugan, siyam niini pinaagi sa knockout. Tulo sa iyang ulahing lima ka kontra iyang na-TKO samtang nakakuha usab siya sa IBF regional crown ug Philippine super featherweight title.
Ang iyang kataposang laban nahitabo sa General Santos City diin nakuha niya ang unanimous decision batok sa Indonesian fighter nga si Hebi Marapu aron masiguro ang IBF regional belt.
Ang umaabot nga duwa dili lang makahatag niya og dugang kasinatian apan usa usab ka oportunidad aron mapalapdan pa ang iyang pangalan sa tibuok rehiyon.
Photo courtesy to: Tapology
