Nagtingkagol sa Abellana Police Station 2 ang 32-anyos nga lalaking rider human wala mauyoni ang iyang joke ngadto sa 18-anyos nga babaye nga nanuroy og sud-an sa Ma. Cristina, Barangay Capitol-Site, dakbayan sa Sugbo.
Ang suspek usa ka Bol-anon apan kasamtangang nagpuyo sa Sudlon, Brgy.Maguikay, Mandaue City. Samtang nagparking sa iyang motorsiklo, ang suspek kay nagpaabot og booking ug wala’y kasayoran nga misumbong na diay ang 18-anyos nga biktima sa kapulisan sa Abellana.
Basi sa imbistigasyon sa kapulisan, ang biktima naninda og sud-an sa nahisgutang lugar ug gidool sa suspetsado aron mopalit og sud-an apan adunay pakapin nga istorya nga ‘tindera lang akong paliton Ma’am’ dugang pa nga ‘Lami ang sud-an pero mas lami ang tindera’.
Ingon man nga giangkon sa suspetsado nga nakasulti siya sa maong mga pulong isip pagkombinsi sa iyang mga amigo nga mamalit og sud-an sa paniudto. Dugang sa suspetsado nga wala na motingog ang maong tindera human sa iyahang joke.
Apan nakurat nalang kini nga mibalik ang babaye ug adunay kuyog nga pulis ug siya gipadakop gumikan giisip kini sa 18-anyos nga usa ka pagbinastos. Kasong RA 11313 o “Safe Spaces Act o Bawal Bastos Law” ang gipasaka nga kaso sa maong rider.
Photo Courtesy to: Alan D
