Gipahibalo sa Department of Transportation (DOTr) nga adunay libreng sakay sa Metro Rail Transit Line 3 (MRT-3) alang sa tanang opisyal nga tournament workforce ug volunteers sa FIFA Futsal Women’s World Cup 2025, diin ang Pilipinas maoy host country.
Sumala sa DOTr, magsugod ang libreng sakay gikan Nobyembre 12 hangtod Disyembre 7, 2025, isip porma sa suporta sa maong internasyonal nga torneo.
Base sa Office Order No. 2025-0826 nga gipirmahan ni DOTr MRT-3 General Manager Michael J. Capati, kinahanglan lang nga ipakita sa mga volunteers ug workforce ang ilang FIFA accreditation passes aron makasakay nga libre.
Pagahatagan sila og magnetic single journey tickets (SJT) alang sa libreng biyahe, ug kini ilang ibalik o ihulog sa nakatalagang kahon sa dihang sila mogawas sa estasyon.
Ang FIFA Futsal Women’s World Cup 2025 mao ang unang higayon nga pagahimoon sa kalibutan, ug gilauman nga 16 ka mga team gikan sa lain-laing nasod ang mokompetensiya gikan Nobyembre 21 hangtod Disyembre 7, 2025.
Photo courtesy: RAPPLER
