Gidumala sa Municipal Government of Bansalan ang usa ka koordinasyon nga panagtapok kagahapong adlawa Nobyembre 11, 2025 sa MMO Conference Room aron hisgutan ang padayon nga kalamboan sa Bansalan Overland Transport Terminal and Business Center, nga kasamtangang ginatukod ubos sa Design and Build scheme.
Atol sa panagtapok, sentro sa diskusyon ang mga tumong nga masiguro ang hustong implementasyon ug progreso sa proyekto, lakip na ang: Pagsusi sa kasamtangang kahimtang sa konstruksyon; Paghatag ug oportunidad sa tanang sektor ug stakeholders nga makahatag og suhestiyon; ug Pagpalig-on sa koordinasyon ug funcionalidad sa Design and Build Committee.
Ang proyekto usa ka dakong lakang sa Bansalan LGU aron mapalambo ang transportasyon ug kalihokan pang-ekonomiya sa lungsod. Gipasabot usab sa mga opisyal nga magpadayon ang kooperasyon, transparency, ug kolaborasyon tali sa lokal nga gobyerno, mga kontraktor, ug stakeholders aron masiguro ang malampusong pagtukod sa terminal ug business center.
SOURCE: MUNICIPAL GOVERNMENT OF BANSALAN
