Gipangandaman sa Iligan City Anti-Drug Abuse Council (ICADAC) ang tinuig nga selebrasyon sa Drug Abuse Prevention and Control (DAPC) Week 2025, nga ipahigayon sa Nobyembre 17–22, 2025, isip kampanya batok sa illegal nga droga.
Karong tuiga, kini adunay tema nga: “Sa Bagong Pilipinas, Kalusugan ay Pinapahalagahan, Droga ay Inaayawan’’.
Mitambong sa miting ang mga representante gikan sa Iligan City Police Office, Bureau of Jail Management and Penology, Gender and Development, ug uban pang ahensiya sa lokal nga gobyerno.
Sugdan ang kalihukan sa Nobyembre 17, 2025 sa Anahaw Amphitheater, pinaagi sa usa ka motorcade nga molibot sa nag-unang kadalanan sa syudad.
Lakip usab sa nakahan-ay nga kalihukan ang pressconference, drug symposium sa mga eskwelahan, mangrove tree planting ug Kapehan sa DAPC, diin pagahisgutan ang mga programa sa anti-illegal drug sa Iligan.
Nakatakda usab ang pagpahigayon ug dula alang sa mga Persons Deprived of Liberty (PDL) apil na ang graduation sa mga Persons Who Use Drugs (PWUDS) sa ilang Community-Based Drug Rehabilitation Program, ug uban pang kalihukan.
Tapuson ang selebrasyon pinaagi sa Zumba Apocalypse sa City Public Plaza, diin ipahigayon usab ang awarding sa mga mananaug sa kompetisyon.
Kahibaloan nga padayon nga gipalig-on sa konseho sa syudad ang mga programa kontra droga aron malikayan ang paggamit niini ug mapadayon ang kahimsog ug kahapsay sa Iligan City.
