Gipahigayon sa probinsya sa Davao de Oro ang dakong kalihokan nga mao ang Provincial Meet ning bag-o lang kon asa nagtipon ang mga delegado gikan sa lain-laing mga munisipalidad aron ipakita ang ilang kahanas ug abilidad sa nagkadaiyang disiplina sa isport.
Ang maong kalihokan gisalmotan sa daghang kabatan-onan nga adunay tinuoray nga pasyon sa kalihokan sa sports, uban sa ilang determinasyon nga makab-ot ang kadaugan ug dungog para sa ilang mga eskwelahan ug komunidad.
Sa interbyu nga gihimo sa Juander Radyo News Team, nahinabi ang Principal sa Nabunturan National Comprehensive High School, nga si Roger H. Prades, EdD. Sumala ni Prades, andam na ang mga estudyante ug kabatan-onan sa pagrepresentar sa ilang eskwelahan, uban ang ilang dakong pagpasalamat sa mga nagpaluyo ug nagsuporta sa maong kalihukan.
Dugang pa niya, nag-awhag siya sa mga ginikanan nga padayon nga suportahan ang ilang mga anak sa nasangpit nga kalihukan, aron malikayan ang mga buhat nga makadaot sa ilang kaugmaon ug aron mapalambo ang maayong pamatasan ug mahamtong nga kinabuhi.
