Gibutyag ni Agnes Clerigo-Maingat, Head sa Economic Enterprise Development and Management Office (EEDMO) Iligan, ang kamahinungdanon sa plano nga pagkontrolar sa paggamit sa single use plastic sa dakbayan.
Matod niya, gipahimangno ni Iligan City Mayor Frederick Sao nga dako kaayo ang problema sa basura kung dili makontrol ang paggamit sa plastic cellophane.
Tungod niini, gitahasan ang opisina sa Local Economic Development and Investment Promotions (LEDIP) office nga mo-conduct og focus group discussions aron masulbad ang isyu.
Dugang pa, nakurat ang amahan sa siyudad sa nakita nga paggamit sa single-use nga cellophane sa pagputos og biskwit ug kape sa Tambo Market sa Iligan.
Sumala ni Maingat, kini usa ka dakong hagit , tungod sa gilaumang daghang reklamo ang posibleng madawat sa ilang buhatan, kung dakpon ang mga tindera ug tendero nga mag-repack sa mga produkto sama sa pamenta ug asin gamit ang cellophane.
