Dali gilayong nagpahigayon ug aksyon ang mga personahe sa Coast Guard Station Davao Oriental pinaagi sa ilang maritime patrol kini human adunay gikatahong oil spill sa kadagatan sa Pujada Bay ning dakbayan sa Mati.
Ang pagpatuman sa operasyon giubanan sa mga sakop sa Coast Guard Marine Environmental Protection Enforcement and Response Unit, Provincial Public Information Office- Davao Oriental ug Coast Guard Sub Station Puajada.
Nasayran nga adunay nadawat nga report ang Coast Guard Station Davao Oriental gikan sa lokal nga residente sa Brgy. Macambol mahitungod sa giingong oil spill sa kadagatan.
Tungod niini, gipatuman gilayon ang pagpatrolya sa maong kadagatan aron susihon ang presensya ug kadak-on sa posibleng kontaminasyon sa lana, apan sa ilang pagsuta walay nakita nga mga sinyales sa oil spill.
Padayon usab ang pasalig sa Coast Guard Station Davao Oriental nga sila adunay mga preventive measures aron mapugngan ang bisan unsang hulga sa polusyon sa kadagatan.
Gi-awhag usab niini ang publiko ilabina ang mga lokal nga mananagat ug adunay makita nga oil slicks o susamang panghitabo daling ireport sa ilang buhatan aron dali nga maaksyonan.
