Gitakda sa Provincial Government of bukidnon (PGB) ang Christmas Lighting 2025, nga ipahigayon karong Nobyembre 20, 2025, sa alas 6:00 sa gabii sa Provincial Capitol Compound, Kaamulan Park Malaybalay City.
Sa exclusive nga pakighinabi sa Juander Radyo Malaybalay, kang Arthur Czar B. Quisado, Provincial Tourism Promotion and Marketing Head Designate, mipaambit nga ang kalihokan magpakita sa lain-laing mga kalihokan, lakip ang Parol Making Contest ug Christmas Village Contest, diin adunay mga trophy ug cash prices nga nagpaabot sa mga mananaog.
Sa temang “Gifts of Cheer, Santa’s Sleigh,” gilauman nga mapuno sa kahayag, awit, ug makapahimuot nga diwa sa Pasko ang Kaamulan Park, diin mamahimong magtapok ang pamilya ug mga higala aron mabati ang mainitong espiritu sa kapaskuhan
Ang mga dekorasyon karong tuiga magpakita sa mga kolor silver, blue, ug gold, nga nagsimbolo sa paglaum, kalinaw, ug kalipay nga dala sa panahon sa kapaskuhan.
Busa, gidapit ang tanang residente nga moapil sa kalihokan, uban sa pagpasalamat sa mga panalangin sa miaging tuig, ug magsaulog sa mahayag nga pagsugod sa panahon sa pasko sa Bukidnon.
via: PGB
