Gipataas na sa Signal No. 1 ang daghang mga lugar sa nasud human mosulod ang Bagyong Uwan sa Philippine Area of Responsibility (PAR), sumala sa Philippine Atmospheric, Geophysical and Astronomical Services Administration (PAGASA).
Sa pinakaulahi nga report sa PAGASA, ang sentro sa bagyo nasigpatan sa sidlakang bahin sa Eastern Visayas nga adunay kusog sa hangin nga muabot sa 120 kilometros kada oras duol sa sentro ug paghuros nga moabot sa 150 kilometros kada oras. Naglihok kini paingon sa kasadpan-amihanang-kasadpan sa gikusgon nga 20 kilometros kada oras.
Lakip sa ubos sa Signal No. 1 ang mga lugar sa Northern Luzon sama sa Nueva Vizcaya, Aurora, bahin sa Rizal ug Laguna; halos tibuok Quezon Province lakip ang Polillo Islands; Romblon, Marinduque, Camarines Norte, Camarines Sur, Albay, Catanduanes, Sorsogon, ug Masbate.
Lakip usab ang mga probinsya sa Northern Samar, Eastern Samar, Samar, Biliran, Leyte, Southern Leyte, ingon man mga bahin sa Cebu, Bohol, Negros Occidental, Iloilo, Capiz, ug Aklan.
Matod sa ahensya, gilauman nga makasinati ang mga nasangpit nga lugar sa kusog nga pag-ulan, hangin, ug posibleng storm surge. Busa gipahimangnoan ang publiko nga magmatngon sa posibleng pagbaha ug pagdahili sa yuta, ilabi na sa mga kabukiran.
via: DOST PAGASA
