Gisugyot sa bag-ong acting police chief sa Cagayan de Oro City Police Office (COCPO) nga kinahanglang adunay ‘holistic approach’ sa pag-atiman sa mga illegal vendor sa siyudad, atol sa iyahang pagbisita sa konseho sa nilabayng adlaw.
Gipasiugda kini ni City Police Chief Col. Dexter Paje sa dihang gipangutana siya ni Konsehal Enrico Salcedo bahin sa usa ka bulan niya nga kasinatian isip pangulo sa usa ka task force batok sa illegal vendors sa Quezon City sa wala pa siya gibalhin sa PNP-10 Regional Mobile Group sa Northern Mindanao niadtong sayong bahin sa 2000s.
Sa dihang gipangutana ni Salcedo—kinsa kanhi co-chairman sa Night Market management committee sa City Hall sa wala pa mapili sa City Council karong tuiga—kung ang problema sa Quezon City sa mga illegal vendor mas seryoso ba kung itandi sa Cogon market, miingon si Col. Paje nga ang probelama sa Cogon Market mahatagan ra og kasulbaran.
Samtang subay sa kasinatian sa night market committee, giingon ni Salcedo nga nakita nila nga lisud ang pagpangayo og kooperasyon sa pulis sa pag-atubang sa mga illegal vendor gawas kung mangayo sila niini pinaagi sa City Economic Enterprise Business Development Administration (CEEBDA).
Nakita nga ang presensya sa mga illegal vendor makatampo sa traffic congestion, labi na sa umaabot nga holiday season ug tungod niini, kinahanglan ang pagtinabangay sa lokal nga panggamhanan, kapulisan ug uban pang buhatan sa syudad lakip na ang pagmugna og Task Group subay na sab sa sugyot ni Col. Paje.
