Nagbilin og grabeng kadaot ang Bagyong Tino, ilabi na sa Visayas ug Mindanao nga miresulta sa kapin 140 ka tawo ang namatay samtang 127 pa ang natala nga nawala.
Una nang gikumpirma sa National Disaster Risk Reduction and Management Council (NDRRMC), base sa datos, buntag sa Huwebes, Nobiyembre 6, nga moabot na sa 114 ka tawo ang natala nga namatay tungod sa bagyo. Apan wala pa maapil niini ang dugang 28 nga natala sa Cebu, ang probinsya nga labing grabe nga naigo. Sa datos sa ahensya, 71 na ang kinatibuk-ang natala nga namatay sa Cebu.
Ang Cebu, diin ikaduhang nag-landfall ang Bagyong Tino, nakaagi sa wala damha nga bul-og sa tubig-baha sa mga lungsod ug syudad diin adunay mga sakyanan nga naanod ug daghang kabalayan ang nalubog sa abot-atop nga baha.
Ang ubang lugar nga nakatala usab og mga namatay ang Negros Occidental, Negros Oriental, Agusan del Sur, Southern Leyte, Antique, Bohol, Capiz, Iloilo, ug Leyte.
Apil usab sa ihap sa mga namatay ang unom ka crew members sa military helicopter nga nahagba samtang anaa sa relief mission alang sa mga naigo sa bagyo.
Photo courtesy: Rappler
