Gimanduan ni Presidente Ferdinand R. Marcos Jr. ang Department of Budget and Management (DBM) nga ipagawas ang ₱1.307 trilyon nga program budget alang sa ikatapusan nga quarter sa tuig 2025.
Ang maong lakang gituyo aron matabangan ang mga Pilipinong naapektuhan sa mga kalamidad ug masiguro nga sila makabangon dayon gikan sa mga kadaot nga gidala sa bagyo ug uban pang kalamidad. Sumala sa DBM, dakong bahin sa pondo ang itutok sa social services ug mga programa nga direkta’ng makabenepisyo sa mga kabus.
Apil niini ang ₱2.74 bilyon alang sa National Disaster Risk Reduction and Management Fund (NDRRMF), nga maglakip sa Quick Response Fund (QRF) replenishment ug Emergency Cash Transfers (ECT) — isip preparasyon sa posibleng mga bagyo sa nahibiling bahin sa tuig.
Sa ubang bahin, ₱9.52 bilyon ang igahin sa Department of Social Welfare and Development (DSWD) alang sa Pantawid Pamilyang Pilipino Program (4Ps) ug uban pang social protection programs.
Lakip usab ang ₱7.03 bilyon para sa Assistance to Individuals in Crisis Situation (AICS), ₱5.77 bilyon para sa social pension sa mga kabus nga senior citizens, ug ₱4.83 bilyon alang sa Ayuda sa Kapos ang Kita (AKAP) program aron masuportahan ang mga vulnerable sectors.
Gihatagan usab og ₱7.33 bilyon ang Department of Agriculture (DA) alang sa National Rice Program, samtang ₱47 bilyon ang ipatuman alang sa National Livestock Program.
Samtang, ang National Food Authority (NFA) adunay ₱2.29 bilyon nga pondo alang sa buffer stocking program ug targeted rice distribution program, aron masiguro ang igo nga suplay sa bugas ilabi na sa panahon sa emerhensya.
Adunay giandam usab nga pondo para sa edukasyon ug panglawas, aron mapadayon ang serbisyo publiko ug kabag-ohan sa sektor sa edukasyon ug kahimsog sa katawhan.
Gipahimangnoan ni Marcos ang tanan nga ahensya sa gobyerno nga gamiton ang pondo sa husto, episyente, ug produktibong paagi aron mapalambo pa ang ekonomiya sa nasud.
Matod sa Malacañang, kung magamit sa tukmang paagi ang maong pondo ilabi na sa imprastruktura, panglawas, edukasyon, ug direktang pinansyal nga tabang, kini makapadani og daghang investor ug makapadasig sa mas lig-on nga ekonomiya sa Pilipinas.
Photo courtesy: PCO
