Gipasigarbo sa Barangay Disaster Risk Reduction and Management Council (BDRRMC) sa Barangay Suarez ,Iligan City ang ilang paspas nga pagresponde sa mga residente sa Sitio Isay nga naapektuhan sa kusog nga pagbaha tungod sa ulan nga dala sa Bagyong “Tino” ning miaging adlaw.
Sa eksklusibong pakighinabi sa Juander Radyo News Team, gipadayag ni Kagawad Eddie Ratunil, Chairman sa BDRRMC, nga walay paglangan ang ilang grupo sa pagtabang sa mga apektadong pamilya, ilabi na sa mga bata ug tigulang.
Matod pa ni Ratunil, gihatagan nila og temporaryong matulogan ang mga biktima samtang gipangandaman sa lokal nga panggamhanan ang dugang nga ayuda ug relief operations.
Gipasabot usab ni Ratunil nga paspas ug organisado ang ilang lihok matag higayon nga adunay kalamidad sa barangay aron mapakita sa katawhan nga alerto ug andam ang BDRRMC sa tanang panahon.
Sa katapusan, gi-awhag niya ang mga residente nga mokontak dayon o makig-koordinar sa ilang buhatan aron dali silang matabangan panahon sa emergency.
