Giangkon sa Philippine Olympic Committee (POC) nga mag-atubang og dakong hagit ang mga atleta sa nasud sa ilang pag-apil sa 33rd Southeast Asian Games nga ipahigayon didto sa Thailand karong bulan sa Disyembre.
Matod pa ni Philippine Olympic Committee (POC) President Abraham “Bambol” Tolentino, daghang mga kategorya diin ang mga atleta sa nasud mahimong makadaog og medalya ang gikuha gikan sa programa.
Gihimo niyang panig-ingnan ang martial arts diin gi-undang na ang weight category. Nahimong flexible ang SEA Games sports program diin ang host country tugotan nga mopaila og bag-ong sports nga dili kasagaran makita sa mga regional ug global competitions.
Mahimo usab silang mo-adjust sa mga events ug categories sa matag sports. Niadtong 2023 SEA Games sa Cambodia, nahuman ang Pilipinas sa ikalimang puwesto nga adunay 58 ka gold medals, 85 ka silvers, ug 117 ka bronze.
Nanghinaot si Tolentino nga mapabilin sa Pilipinas ang rankings niini o malabwan pa kini. Magpadala ang Pilipinas og 1,600 ka atleta nga mosalmot alang sa SEA Games didto sa Thailand.
Photo courtesy: POC – Philippine Olympic Committee – Olympic.PH
