Nasikop sa hiniusang pwersa sa Tagum City Police Station, Provincial Drug Enforcement Unit kon (PDEU), Davao del Norte Provincial Intelligence Unit kon (DNPIU), ug 1st Davao del Norte Provincial Mobile Force Company kon (1st DNPMFC) ang mag-live-in partner atol sa gipahigayon nga anti-illegal drug buy-bust operation alas 2:19 sa kadlawon, Nobyembre 03, 2025, sa Barangay San Miguel, Tagum City.
Giila ang mga nadakpan nga sila si alias “TARZO”, 29 anyos, temporaryong nagpuyo sa Purok 3-D, Abatayo-Domingo Compound, Barangay San Miguel, Tagum City ug lumad nga residente sa Barangay Malamodaw, Maco, Davao de Oro; ug ang iyang ka-live-in partner nga si alias “JANE”, 31 anyos, nga temporaryong nagpuyo usab sa Barangay San Miguel ug residente sa Barangay Apokon, Tagum City.
Napalitan sa poseur-buyer ang mga suspetsado ug usa ka big rectangular heat-sealed transparent plastic sachet nga adunay sulod nga gituohang shabu, gamit ang Php 500.00 buy-bust money ug upat ka machine copies sa tig P1,000 bill.
Gikumpiska usab gikan kang alias “TARZO” ang upat ka sachet nga adunay sulod nga shabu, usa ka .38 caliber pistol nga adunay tulo ka live ammunition, ug duha ka coin purse. Samtang kang alias “JANE”, nakuha ang usa ka sachet nga adunay sulod usab nga gituohang shabu. Ang nakumpiskang iligal nga droga adunay gibanabana nga timbang nga 2 gramo ug kantidad nga Php 13,600.00 base sa standard drug price.
Ang duha ka suspetsado karon anaa na sa kustodiya sa Tagum City Police Station. Si alias “TARZO” mag atubang sa kasong paglapas sa Section 5 ug 11, Article II sa R.A. 9165 (Comprehensive Dangerous Drugs Act of 2002) ug R.A. 10591 (Comprehensive Firearms and Ammunition Regulation Act), samtang si alias “JANE” mag-atubang usab sa kaso sa Section 5 ug 11, Article II sa R.A. 9165.
Photo Courtesy to:Tagum City Police Station
