Gipailawom sa Provincial Government sa Bukidnon ang probinsya ngadto sa Bravo Status (Medium Risk) sa Emergency Preparedness and Response (EPR) protocols isip precautionary measure tungod sa padayong epekto sa Bagyong Tino.
Sa pagpangulo ni Governor Rogelio Neil Roque, gihimo ang deklarasyon human sa usa ka coordination meeting uban sa Provincial Disaster Risk Reduction and Management Council (PDRRMC) kagahapon Nobembre, 3. Ang lakang nagtumong sa pagsiguro nga ang tanang response teams, logistics, ug communication systems sa tibuok 22 ka LGUs sa probinsiya anaa sa full alert aron mapanalipdan ang mga komunidad.
Hugot ang panawagan ni Governor Roque sa katawhan sa lalawigan, ilabi na sa northern part of Bukidnon, nga nakasinati sa kasarangan ngadto sa kusog nga ulan, nga mangandam kanunay batok sa Bagyong Tino.
Ang maong pamahayag gihimo sa Pre-Disaster Risk Assessment (PDRA) Scenario Building Process sa PHRMO Training Center, Capitol Compound, nga gipasayon sa PDRRMO-Bukidnon, uban sa mga representante gikan sa DILG, PAGASA, PNP, AFP, BFP, DepEd, PIA, PEO, PBO, PAdmO, BUSECO, PGSO, PSWDO, ug PGO-PAIA.
Usa sa mga gipatuman nga aksyon mao ang pag-activate sa Emergency Operations Center (EOC) nga kasamtangang naa sa Blue Alert Status, pre-positioning sa mga response equipment, pagpakaylap sa kasayuran pinaagi sa weather bulletins, ug pagsiguro sa kaandam sa tanang response teams ug resources sa probinsiya.
via: Oniel Roque
