Mikusog ang hangin ug ulan human nga nag-landfall ang Bagyong “Tino” sa lungsod sa Silago, Southern Leyte, base sa pinakabag-ong update sa Philippine Atmospheric, Geophysical and Astronomical Services Administration (PAGASA).
Sumala sa PAGASA, nakita ang sentro sa bagyo sa palibot sa Mahaplag, Leyte, nga nagpadayon sa paglihok padulong sa kasadpan (west direction) sa tulin nga 30 kilometro matag oras.
Gipabilin ni “Tino” ang kusog nga hangin nga 150 kilometro matag oras ug huros nga moabot sa 205 kph.
Sa pagkakaron, padayon nga nakataas ang Signal No. 4 sa pipila ka mga lugar sa Eastern Samar, Leyte, Cebu, Bohol, Negros, Guimaras, Dinagat Islands, ug Siargao-Bucas Grande Islands.
Ang mga lugar nga apektado sa Signal No. 3 naglakip sa mga bahin sa Eastern ug Western Visayas, lakip ang Ormoc City, Iloilo, Capiz, Antique, ug uban pang probinsya sa Negros ug Bohol.
Samtang ang Signal No. 2 ug Signal No. 1 nakataas sa mga kasikbit nga dapit lakip ang Samar, Biliran, Surigao del Sur, Agusan del Norte, Agusan del Sur, Bukidnon, ug Misamis Oriental.
Gipahimangnoan sa PAGASA ang tanan nga mga residente sa mga lugar nga apektado sa bagyo nga magpabilin sa mga luwas nga dapit ug maminaw sa opisyal nga pahibalo gikan sa mga lokal nga disaster offices.
Padayon usab ang pagbantay sa mga coastal areas tungod sa posibleng storm surge, kusog nga hangin, ug pagbaha.
Photo credit: DOST-PAGASA
