Gipagula ni Mayor Roxanne C. Pimentel ang Executive Order No. 46, Series of 2025, nga naglatid sa mga lakang nga ipatuman sa syudad isip tubag sa hulga sa Severe Tropical Storm “Tino” (Kalmaegi) nga kasamtangang nakaapekto sa rehiyon.
Base sa pahibalo sa Department of Science and Technology – Philippine Atmospheric, Geophysical and Astronomical Services Administration (DOST-PAGASA) Mindanao Regional Services Division, gilauman nga magdala si “Tino” og dag-um nga kalangitan uban sa halapad nga pag-uwan ug mga pagdalugdog sa rehiyon sa Caraga. Posible usab ang flash flood ug landslide tungod sa kasarangan hangtod kusog nga pag-ulan, uban sa kasarangan hangtod kusog nga hangin ug baybaying dagat nga mahimong kasarangan hangtod sa dagko ang balod.
Gipahigayon usab sa City Disaster Risk Reduction and Management Council (CDRRMC) sa Tandag City ang Pre-Disaster Risk Assessment (PDRA) aron ma-evaluate ang risgo ug matino ang angay nga mga lakang sa pagpangandam ug pagtubag sa kalamidad.
Tungod niini, gimando sa syudad ang mosunod nga mga lakang:
1. Pag-aktibar sa City Emergency Operations Center (EOC) aron magpasiugda sa koordinasyon ug pagmonitor sa mga kalihokan sa pagresponde.
2. Pagpatuman sa “No Sail” ug “No Sea and River Activities” policy aron malikayan ang disgrasya sa dagat ug sapa.
3. Pagpahigayon sa pre-emptive evacuation sa mga lugar nga giila nga high-risk sa baha ug landslide.
4. Pag-suspinde sa klase sa tanang lebel aron maprotektahan ang mga estudyante ug magtutudlo.
5. Temporaryong paghunong sa mga outdoor tourism-related activities hangtod nga luwas na ang panahon.
Ang tanan nga opisina sa lokal nga kagamhanan, gimanduan usab nga magpabilin nga alerto ug motabang sa emergency response operations hangtod matapos ang hulga sa bagyo.
PHOTO COURTESY TO: LGU TANDAG
