Gipangandaman na sa National Capital Region Police Office (NCRPO) ang posibilidad nga adunay mga lihok protesta nga ipahigayon sa mga progresibong grupo nga matunong sa paghandom sa Undas karong Nobyembre.
Sa usa ka pulong sa Camp Crame, gipahayag ni NCRPO Spokesperson Police Major Hazel Asilo nga gawas sa pagbantay sa kalinaw sa Undas, ilang gimonitor usab ang mga grupo nga posibleng maghimo og mga pagtigom o rally sa parehas nga adlaw.
Matod pa ni Asilo, dili na malikayan ang ingon ani nga mga kalihokan tungod kay adunay mga grupo nga mapahimuslanon sa maong okasyon aron ipagawas ang ilang mga programa ug mensahe.
Tungod niini, nagpahimutang ang NCRPO og reserve force nga maoy moresponde kung adunay rally nga mahimong matunong sa Undas. Sa pagkakaron, wala pay naobserbahang aktibong grupo nga nag-aplay og rally permit, apan padayon ang intel monitoring sa kapulisan aron mahibal-an ang mga posibleng lihok sa mga aktibista.
Giingon ni Asilo nga hapit 600 ka mga pulis gikan sa mga district offices ug regional headquarters ang giandam isip reserba alang sa seguridad ug crowd control kon magkinahanglan.
Samtang, wala pay nakitang direktang hulga ang Philippine National Police alang sa adlaw sa Undas, apan gipasabot ni Asilo nga nagpabilin ang koordinasyon sa lain-laing ahensya aron andam sila kung adunay kalit nga mga kalihokan.
Gipasalig ni Asilo nga andam ang NCRPO sa bisan unsang sitwasyon ug dili kini makapahamtang og kalisod sa publiko sa pag-obserba sa Undas karong tuiga.
Photo Courtesy: Philstar.com
