BUS DRIVER, NAGPOSITIBO SA GIPAHIGAYONG OPLAN HARABAS SA TAGUM CITY

Nagpositibo ang usa ka driver sa Public Utility Bus atol sa gipahigayong Oplan Harabas o ang surprisang drug testing alang sa mga konduktor ug driver sa mga bus, van, ug jeep sa Tagum Overland Transport Integrated Terminal (TOTIT) sa Barangay Magugpo West, Tagum City, niadtong nilabay’ng adlaw Oktubre 28, 2025.

Sumala sa City Anti-Drug Abuse Council (CADAC) Tagum, gikan sa 150 ka mga driver ug konduktor nga gipailawom sa drug testing, usa niini ang nagpositibo sa paggamit og iligal nga droga.

Nunot sa maong resulta, nagpahigayon gilayon ang mga otoridad og confirmatory test sa maong driver nga kasamtangan pang ginaproseso, samtang gikuhaan una kini og driver’s license, uban sa pahimangno nga mabalik lamang kini kung siya mopailalom sa drug dependency examination ug unom ka bulan nga rehabilitasyon.

Gipangunahan sa buhatan sa LTO ang maong programa inubanan sa LTFRB, nga gipasiugdahan sa PDEA DavNor, uban sa koordinasyon sa PNP, CADAC, PADAC, CEEO, ug City Sanitation Unit (CSU) isip kabahin sa preparasyon alang sa Undas 2025, aron masiguro ang kaluwasan sa mga pasahero ug publiko.