Nagpagawas og pahimangno ang kapulisan sa Nabunturan pianagi ni Police Lieutenant Colonel Gomersendo L. Diwata II, ang hepe sa Nabunturan Municipal Police Station, kabahin sa siguridad ug kalinaw sa pagsaulog sa Kalag-Kalag 2025.
Matod pa niya gilauman nga daghang katawhan ang mobisita sa mga sementeryo aron sa paghinumdom sa ilang mga minahal sa kinabuhi, busa gipanawagan niya sa publiko nga magmatngon, magdisiplina, ug mosunod sa mga balaod nga ipatuman sa kapulisan atol sa maong okasyon.
Dugang pa niya, ipahigayon ang hugot nga seguridad sa tanang sementeryo ug dagkong kalsada aron malikayan ang kalihokan sa mga dautang elemento.
Gidili usab ang pagdala sa mga bino, armas, ug ubang butang nga makapahamtang og katalagman. Gihangyo usab sa kapulisan ang publiko nga ipahibalo dayon ang bisan unsang kahina-hinalang kalihokan ngadto sa labing duol nga estasyon sa kapulisan.
