Pormal nang milingkod isip bag-ong Regional Director sa Technical Education and Skills Development Authority (TESDA) Region 9 si Director Alan T. Bacatan hulip kang Outgoing Regional Director Tarhata S. Mapandi, CESO III.
Kini human sa pormal nga pagturn-over sa yawe ni Outgoing RD Mapandi atol sa gipahigayong Turn-over Ceremony nga gihimo sa may Mardale Hotel, Pagadian City, karong adlawa, Oktubre 29, 2025.
Si Incoming Regional Director Bacatan kanhing Provincial Director sa TESDA Zamboanga del Norte ug kasamtangan usab nga OIC Assistant Regional Director sa TESDA 9.
Ang kalihukan gitambungan sa mga Provincial Director sa nagkadaiyang mga Provincial Offices ug mga District Offices gikan sa nagkalain-laing bahin sa Zamboanga Peninsula.
Lakip sa mitambong ang mga pili nga personahe sa TESDA 9, Provincial Offices, ug mga District Office isip pagpakita sa ilang mainitong suporta ug pagdawat sa bag-ong Regional Director.
