Gipadayag sa Gobyerno sa Austria ang ilang plano nga palapdan ang pag recruit sa mga Filipino health professionals, lakip na ang mga nars ug caregivers, isip tubag sa nagpadayong panginahanglan sa sektor sa panglawas sa ilang nasud.
Sumala sa Department of Migrant Workers (DMW), gipaabot mismo sa Austrian government ang ilang pormal nga interes sa pagkuha og dugang nga Filipino medical workers, nga giila nga maayo ug mapinanggaon sa serbisyo.
Gawas sa health sector, plano usab sa Austria nga modugang sa pagkuha og mga Filipino workers alang sa industriya sa turismo, diin dako ang kontribusyon sa mga Pilipino tungod sa ilang kahibalo, kahanas, ug maayong serbisyo sa mga bisita.
Sa kasamtangan, may kapin sa 8,000 ka Overseas Filipino Workers (OFWs) ang nanimuyo ug nagtrabaho sa Austria. Sa maong ihap, 700 ka OFWs ang na-deploy ngadto sa nasud sa miaging duha ka tuig, sumala sa datos sa DMW.
Gipasabot sa ahensya nga ang plano sa Austria maghatag ug dugang oportunidad sa mga Pilipinong propesyonal, ilabi na sa mga nars, caregivers, ug tourism-related workers, nga nagtinguha sa mas taas nga kita ug mas maayong kahimtang sa trabaho.
Gisaad usab sa DMW nga magpadayon kini sa koordinasyon sa Austrian government aron masiguro ang proteksyon ug hustong benepisyo sa tanang mga Pilipinong trabahante nga ipadala sa maong nasud.
PHOTO COURTESY TO: BRITANNICA
