Gibutyag sa kadumalahan sa Congressional Office nga padayon ang ilang mga paningkamot aron mapahapsay ang mga kadalanan ug masiguro ang kaluwasan sa mga tinun-an sa Iligan City.
Kahinumduman nga usa sa mga gihingusgan nga proyekto sa Congressional Office sa Lone District of Iligan pinaagi ni Congressman Celso Regencia mao ang paghimo og mga overpass doul sa mga eskwelahan nga anaa sa National Highway, aron malikay sa peligro ang mga sutdyante sa ilang pagtabok sa karsada.
Sumala ni Volunteer Program Coordinator Holden Ian Loking,gikan sa buhatan ni kongresista nga ang proyekto resulta sa hangyo sa mga magtutudlo ug ginikanan aron mapadali ug maprotektahan ang pag-agi sa mga estudyante sa ilang pagsulod ug paggawas sa eskwelahan.
Gipadayag usab ni Loking ang iyang kalipay nga nahuman na ang pipila ka mga overpass nga karon napahimuslan na sa publiko ug mga tinun-an.
Nunot niini, naghatag usab ug pahimangno si Loking sa mga drayber nga maghinay-hinay sa pagpadagan ilabi na sa daplin sa mga eskwelahan, aron malikayan ang disgrasya ug mapanalipdan ang mga bata.Sa katapusan, iyang gipahibalo nga sa padayon pa ang konstruksyon sa overpass sa Barangay Tubod, nga dako og tabang aron mapakunhud ang trapiko sa lugar ilabi na sa rush hour.
